திருமாவளவனை கண்டித்து தடையை மீறி ஆர்ப்பாட்டம் நடத்த சென்ற எச் ராஜா கைது செய்யப்பட்டார். விடுதலை சிறுத்தைகள் கட்சித் தலைவர் திருமாவளவன் இந்துக்களின் மனது புண்படும்படி பேசியதாக அவர் மீது சர்ச்சை எழுந்தது. அம்பேத்கர் நினைவு நாளில் கூட்டத்தில் பேசிய திருமாவளவன், ‘அயோத்தியில் ராமர் கோயில் இருந்த இடத்தில் பாபர் மசூதி கட்டப்பட்டது. அதனால் பாபர் மசூதி இடிக்கப்பட்டதாக சங் பரிவார் போன்ற அமைப்புகள் கூறி வருகின்றன.
இந்தியாவில் உள்ள பெரும்பான்மையான சிவன் கோவில்களும், பெருமாள் கோவில்களும், பௌத்த விஹார்களையும், சமண கோவில்களையும் இடித்துவிட்டுத்தான் கட்டி இருக்கிறார்கள். ஒரு வாதத்திற்கு கேட்கிறேன். சிவன் மற்றும் பெருமாள் கோவில்கள் இருக்கும் இடங்களில் புத்த விஹார்கள் கட்ட தயாரா?’ என்று பேசினார். இதையடுத்து இந்துக் கோயில்களை இடிக்க வேண்டும் என பேசியதாக கூரி திருமாவளவனுக்கு பாஜக தலைவர்கள் கண்டனம் தெரிவித்தனர். இந்து கோவில்கள் குறித்தும், பிரதமர் மோடி குறித்து கடுமையாக விமர்சித்த திருமாவளவன், ‘நீச் ஆத்மி’ என்ற மணிசங்கர் அய்யர் ஆகியோரை கண்டித்து, பாஜக சார்பில் காரைக்குடியில் போராட்டம் நடத்தப்பட்டது. அப்போது பேசிய அக்கட்சியின் தேசிய செயலர் எச்.ராஜா, வேட்டியை மடித்து கட்டினால் தானும் ரவுடி தான் என்றார். திருமாவளவனுக்கு புதியதாக ‘தீயசக்தி திருமா’ என்ற அடைமொழியையும் கொடுத்தார். சீர்காழியில் டிசம்பர் 11ம் தேதி நடைபெற்ற கண்டன ஆர்ப்பாட்டத்தின் பாஜகவினர் மீது வி.சி.க வினர் கல்வீசி தாக்குதல் நடத்தியதாக கூறப்படுகிறது.
திருமாவளவனை கண்டித்து பாஜக சார்பில் ஆர்ப்பாட்டம் அறிவிக்கப்பட்டது. ஆனால் இதற்கு நாகை போலீஸார் அனுமதி மறுத்தனர். இந்நிலையில் ஆர்ப்பாட்டம் நடத்துவதற்காக பாஜக தேசிய செயலாளர் எச் ராஜா நாகப்பட்டினம் சென்றார். அவரை வாஞ்சியூரில் தடுத்து நிறுத்தி போலீசார் கைது செய்தனர். எச் ராஜாவை வரவேற்க சென்ற 100க்கும் மேற்பட்ட காக்கி டவுசர் அணிந்த பாஜகவினரையும் போலீஸார் கைது செய்தனர். எச் ராஜா கைது செய்யப்பட்டதால் பாஜகவினர் போலீசாருடன் வாக்குவாதத்தில் ஈடுபட்டனர். இதனால் நாகை மாவட்டம் வாஞ்சியூரில் பரபரப்பு ஏற்பட்டது. இது தவிர சென்னையில் ஆர்.கே.நகரில் தொகுதியில் அமைச்சர்கள் முகாமிட்டு தெருவுக்கு தெரு வாக்காளருக்கு பணம் தருகின்றனர் என திமுக வேட்பாளர் மருதுகணேஷ் குற்றம்சாட்டியுள்ளார். திமுகவினர் சுமார் ரூ.20 கோடியை பிடித்து கொடுத்து உள்ளனர் என மருதுகணேஷ் கூறியுள்ளார். சுமார் ரூ.100 கோடியை வாக்காளருக்கு வழங்க அதிமுக திட்டமிட்டுள்ளதாக திடுக்கிடும் தகவல்கள் வெளியாகி உள்ளது.
கொருக்குப்பேட்டை ராதாகிருஷ்ணன் நகரில் உள்ள பிசியோதெரபி மையத்தில் ரூ.13 லட்சம் பறிமுதல் செய்யப்பட்டுள்ளது. இது தொடர்பாக திருவண்ணாமலையை சேர்ந்த அதிமுக பிரமுகர் பச்சையப்பனிடம் போலீசார் விசாரணை நடத்தி வருகின்றனர். அதிமுகவினரிடம் இருந்து மூட்டை மூட்டையாக பணத்தை போலீசார் பறிமுதல் செய்துள்ளனர். ஒரு வீட்டில் ரூ.20 லட்சம் பதுக்கப்பட்டு உள்ளதாக தேர்தல் அதிகாரியிடம் திமுக புகார் தெரிவித்துள்ளது. பணம் பதுக்கப்பட்டுள்ள வீட்டுக்கு எதிரே திமுகவினர் போராட்டம் நடத்தி வருகின்றனர். கொருக்குப்பேட்டையில் பணம் பதுக்கப்பட்ட வீட்டுக்கு பூட்டு போடப்பட்டுள்ளது. ஆர்.கே.நகர் தொகுதியில் மொத்தம் 210 வாக்குச் சாவடிகள் உள்ளன. ஒவ்வொரு சாவடிக்கும் பணம் தர சராசரியாக 50 பேர் நியமிக்கப்பட்டுள்ளனர்.
ஒருவர் அதிகபட்சமாக 50 வாக்குக்கு பணம் தர ஏற்பாடு செய்யப்பட்டுள்ளது. ஆர்.கே. நகரில் தொகுதி மக்களுக்கு அ.தி.மு.க. சார்பில் வாக்காளர் ஒருவருக்கு ரூ.6 ஆயிரம் பணம் பட்டுவாடா செய்யப்படுகிறது என தேர்தல் ஆணையத்திடம் தி.மு.க. புகார் தெரிவித்துள்ளது. உங்கள் நியூஸ் கப்சா நிருபர் விசாரித்ததில், கன்னியாகுமரி மீனவர் பிரச்னை, ஆர்கே நகர் பணப்பட்டுவாடா குறித்த செய்திகளை திசை திருப்பவே, இந்துத்வா, கோவில் இடிப்பு, மசூதி என திட்டமிட்டு பாஜகவும், அதிமுகவுன் இணைந்து இந்த கைது நாடகத்தை நடத்தியதாக தெரிகிறது.
